Հեղինակը Վենետիկի Հանրապետութեան իշխանաւորներէն է։ Ան պատրաստած է կոթողային ուսումնասիրութիւն մը, որուն նպատակն էր խաչակրութիւն մը կազմակերպել Եգիպտոսի Սուլթանին դէմ, ազատագրելու համար Ս. Երկիրը։
Հեղինակը ապրած է 1270-1343-ի շուրջ:
Խաչակրութեան ծրագրին քաղաքական եւ զինուորական երեսները ներկայացնելէ ետք, Մարինոյ Սանութոյ Թորսելլոյ նկատի առած է նաեւ խաչակրութեան հանդէպ արեւելքցի ժողովուրդներուն կարելի հակազդեցութիւնները, որոնց մէջէն անցնելու էին խաչակիր զօրքերը հասնելու համար Եգիպտոս։
Այս առթիւ է, որ հեղինակը կ'անդրադառնայ նաեւ Կիլիկիոյ հայ թագաւորութեան, կը նշէ հոն ապրող ժողովուրդին կրօնական դաւանանքը, ծոմապահութեան օրէնքները, հայկական տօնացոյցի իւրայատկութիւնները, Կաթողիկոսին վայելած բացառիկ վարկը, եւն.: Այս բոլորը դիտուած են եւրոպացիի կողմէ եւ, պէտք է ըսել, արտայայտուած՝ բաւականին ճշգրտութեամբ։